Индияда президенттик шайлоодо Улуттук демократиялык альянстын талапкери Драупади Мурму жеңип чыкты.
Бул тууралуу чет элдик басылмалар жазышты.
Ал штаттардын жана аймактардын парламенттеринин жана жергиликтүү ассамблеяларынын мүчөлөрүнүн ичинен шайлоочулардын 64% добушун алды. Ал эми анын оппозициядагы атаандашы Яшвант Синха 36% добушка ээ болду.
Драупади Мурму өлкөнүн бардык штаттарында добуш алган, негизги атандашы Синха үч штатта утулуп калды.
Ал өлкөнүн тарыхында мамлекет башчы болгон экинчи аял. Биринчиси 2007-2012-жылдары өлкөнү башкарган Пратибха Девисингх Патил болгон.
Мурму азыркы президент Рам Натх Ковинддин ыйгарым укуктарынын мөөнөтү аяктаганга бир күн калганда, 25-июлда ант берет.
Белгилей кетсек, Индиянын президенти беш жылдык мөөнөткө, эң көп дегенде эки мөөнөткө шайланат.
Индияда президенттик шайлоо 18-июлда өтүп, добуштар 21-июлда саналган.
Эске салсак, Индия парламенттик республика болгондуктан, өлкөдө президент негизинен өкүлчүлүк функцияларды гана аткарат.
